БАЯНХОНГОР АЙМГИЙН БАЯН-ОВОО СУМ
ЗАРЛАЛ
ИРГЭДИЙН ТӨЛӨӨЛӨГЧДИЙН ХУРЛЫН ДАРГЫН МЭНДЧИЛГЭЭ

Шинийг санаачилж, ихийг бүтээцгээе

Хөх бүрдэн нуураа дээдлэн шүтэж, өндөр мэдлэг боловсролтой сэхээтнүүдээр удирдуулан амьдарч ирсэн үе үеийн түүхийг манай сумын хөдөлмөрч ард түмэн бүтээсэн билээ.

Техникийн өндөр хурдацтай шинэ зуун, шинэ эринд Баян-Овоочууд бид хэтийн зорилготой, алсын хараатайгаар сум орноо хөгжүүлэх нь нэн тэргүүний зорилт болж байна. Нутгаа хөгжүүлэх арван хоёр жилийн хөгжлийн стратеги төлөвлөгөө боловсруулан хэрэгжүүлж байгаад сумын удирдлага, ард иргэд бид баяртай байна. Төрийн үйлчилгээний таатай орчин бүрдүүлэн хүний хөгжлийг хангаж, бизнесийн таатай орчин бүрдүүлэн, сумаа хөгжүүлэх нь энэхүү телөвлөгөөний гол агуулга болж байгаа юм. Үүнийг хэрэгжүүлэх үүднээс иргэн бүр үүрэг хариуцлагаа ухамсарлан, нэг санаа нэгдмэл зорилготой, бүтээлч сэтгэлээр хамтарч ажиллах, ажилсаг ард түмнийхээ санал бодолд тулгуурлан гэгээлэг оюунаар сумаа хөгжүүлэх нь нутгийн удирдлагын байгууллагууд, Баян-Овоо нутгаар овоглосон та бидний ард түмнийхээ өмнө хүлээсэн үүрэг билээ. Төрсөн нутгийнхаа хөгжлийн төлөө сэтгэл нэгдэн, дэмжиж ажиллах Баян-овоо нутгийн гаралтай бизнесменүүд, төрийн албан хаагчид болон бусад хүмүүс, гадаад дотоодын түншүүдтэй хамтран ажиллахад сумын ИТХ-ын байгууллага бэлэн байгаагаа хэлэхэд таатай байна.

Ирээдүйн бүтээн байгуулалтыг зөв төлөвлөж сумын хөдөлгөгч хүч болсон хүнээ хөгжүүлэх, хойч үеийнхээ гэрэлт ирээдүй болсон залуучууд, үр хүүхдийнхээ залгамж халаад сайн сайхан амьдралыг өвлүүлэх нь сумын хөгжлийн стратеги төлөвлөлтийн мөн чанар юм.

Сум орноо хөгжүүлэх стратеги төлөвлөгөө боловсруулахад сургалтыг зохион байгуулж арга зүйн туслалцаа үзүүлэн хамтран ажилласан Мэрси Кор Олон Улсын байгууллага, Монголын нутгийн Удирдлагын холбоо, зөвлөх багш М.Мянганбуу  болон хамтран зохион байгууллагчдад энэ байгууллагын хамт олонд сумынхаа нийт ард иргэдийнхээ өмнөөс баярласнаа илэрхийлж, та бүхэнд ажлын их амжилт, эрүүл энхийг хүсэн ерөөе.

Баян-Овоочууд "Сумын хөгжилд таны оролцоо, нутгийн хөгжилд бидний зүтгэл" уриан дор сумынхаа хөгжил цэцэглэлтийн төлөө өөрийн мэдлэг боловсрол, хөрөнгө хүч, сэтгэл оюунаа зориулан ажиллаж, үнэтэй хувь нэмэр оруулна гэдэгт итгэл дүүрэн байна.

Та бидний зорьсон зорилго, хийж бүтээх үйлс сэтгэлчлэн бүтэхийн өлзийтэй ерөөлийг дэвшүүлье

Мэдээ оруулсан: 2016-05-19 16:55:00